स्थानीय तह निर्वाचन : २८ पालिकाकाे ७७ वटा मतदान केन्द्रमा मतदान स्थगित

काठमाडाैँ –  निर्वाचन आयोगले १६ जिल्लाका २८ वटा पालिकामा मतदान स्थगित भएको जनाएको छ । दलहरुको आपसी विवाद र झडपका कारण ४३ वटा मतदान स्थलका ७७ वटा मतदान केन्द्रमा मतदान स्थगित भएको प्रमुख निर्वाचन आयुक्त दिनेशकुमार थपलियाले जानकारी दिए ।

राजनीतिक दल तथा उम्मेदवारका बीचमा भएको आपसी विवाद, अत्यनते सानातिना विषयमा पनि विवाद झागिंदै जाने र अन्त्यमा त्यसले उग्र रुप लिदा ती ठाउँमा मतदान स्थगित गरिएको उनको भनाइ छ ।


झडपको अवस्था आएपछि केही स्थानमा प्रहरीद्वारा बल प्रयोग गर्नुपर्ने अवस्था आएको उनको भनाइ छ । आज मौसम खराबीका कारण पनि केही स्थानीय तहमा ठूलो वर्षातका कारणले सबै मतदाताले सहभागी हुन नसकेको स्थितिकाबीच सम्बन्धित निर्वाचन अधिकृतले मतदान स्थगन गरेको उनको भनाइ छ ।

स्थगन गरिएको स्थानमा सम्बन्धित निर्वाचन अधिकृतको कार्यालय र आयोगसँग समन्वय गरेर त्यहाँको वस्तुस्थिति समेतको आधारमा छिट्टै पुनः मतदानको प्रक्रिया अघि बढाइने प्रमुख निर्वाचन आयुक्त थपलियाले बताए ।

प्रकृतिको अप्ठ्यारोको कारण केही हिमाली जिल्लाहरु, दुर्गम जिल्लाहरु, आवागमनमा अप्ठ्यारो भएका जिल्लाहरुमा हेलिकोप्टरको माध्यमबाट भोलि ने मतपेटिकाहरु ओसार्नेगरी आवश्यक व्यवस्था मिलाइएको उनको भनाइ छ ।

आयोगले दुई ठाउँबाट निर्वाचनको अनुगमन गरेको थियो । नियोगद्वारा सञ्चालित कल सेन्टर र निर्वाचन आयोगमा पहिलादेखि नै स्थापना भएको संयुक्त निर्वाचन सञ्चालन केन्द्रबाट प्राप्त विवरणको आधारमा ६४ प्रतिशत मतदान भएको प्रारम्भिक अनुमान उनले गरे ।

निर्वाचन आयोगले अपेक्षा गरेअनुसार मतदान नभएको उनको भनाइ छ । विभिन्न कारणले गर्दा अपेक्षाअनुसार मतदान नभएको उनको भनाइ छ ।

Leave a Reply

Your email address will not be published.