काठमाडौं– राष्ट्रिय स्वतन्त्र पार्टीका केन्द्रीय समिति सदस्य गणेश कार्कीले पार्टीका महामन्त्री तथा प्रवक्ता मुलुक ढकालले आफ्नी गुरुमालाई गुरुदक्षिण स्वरूप समानुपातिक सांसद बनाएको आरोप लगाएका छन् ।
पार्टीले शनिबार आफ्नो भागमा परेको प्रतिनिधिसभा तर्फको समानुपातिक १३ जना सांसदको नाम निर्वाचन आयोगमा बुझाएपछि कार्कीले यस्तो टिप्पणी गरेका हुन् ।
कार्कीले पार्टी परित्यागको घोषणा गरेका छन् ।
महामन्त्री ढकालले पार्टीको थितिविपरीत आफ्नी गुरुमालाई गुरुदक्षिणा र आफ्नो कर्मचारीलाई अवसर स्वरूप समानुपातिक सांसद नबनाएको भए आफू सांसद बन्ने कार्कीको भनाइ छ । उनले फेसबुकमा लेखेका छन्, ‘म नि झन्डै सांसद भएको थिएँ । हुन्थेँ पनि यदि राष्ट्रिय स्वतन्त्र पार्टीका महामन्त्री तथा प्रवक्ता मुकुल ढकालजीले आफ्नो गुरुमालाई गुरुदक्षिणा र आफ्नो कर्मचारीलाई अवसर दिन नपरेको भए ।’
उनले आफू खसआर्य खुलातर्फको दोस्रो नम्बरमा भएको बताएका छन् । कार्कीले पार्टीभित्र थिति बसाउनका लागि सुरुदेखि नै प्रयास गरे पनि आफू असफल भएको बताए । ‘जति प्रयास गरे पनि थिति बसाउन सकिएन । म अन्तिमसम्म थिति, विधि भन्दै आवाज उठाइरहेँ । यत्रा मानिसहरूले आशा गरेको पार्टीलाई दुरुपयोग गर्नबाट रोक्न सकिनँ । मेरो भागमा पर्ने कमजोरी स्वीकार्दै माफी चाहन्छु । तर, यो यात्रा रमाइलो थियो । पुरानालाई एउटा दामी धक्का हानिएकै हो तर त्यसको उपलब्धिको दुरुपयोग भयो । यो यात्रामा साथ दिने, मलाई विश्वास गरेर घण्टीमा भोट दिने वा माग्ने सबैप्रति आभारी छु ।’