बाईडेनको सयदिन अन्तर्राष्ट्रिय सम्बन्ध सुधार गर्दै, आर्थिक सुधार, कोरोना नियन्त्रण, अध्यागमन कानुनमा सुधार

अमेरिकी राष्ट्रपति जो बाइडेनले कार्यभार सम्हालेको एकसयदिन पूरा भएको छ । यो एकसयदिनमा बाइडेनले गरेका संख्यात्मक कामको विवरण रोचक छ ।

बाइडेनले कार्यभार सम्हालेको सुरुको एकसयदिनमा ४२ वटा कार्यकारी आदेशमा हस्ताक्षर गरे । जुन बराक ओबामाले सुरुको एकसयदिनमा हस्ताक्षर गरेका कार्यकारी आदेशको तुलनामा दोब्बरभन्दा बढी हो । ओबामाले सुरुको एकसयदिनमा १९ वटा र डोनाल्ड ट्रम्पले २९ वटा कार्यकारी आदेशमा हस्ताक्षर गरेका थिए ।

त्यस्तै बाइडेनले सुरुको एकसयदिनमा जम्मा ११ वटा बिलमा मात्र हस्ताक्षर गर्न सफल भए । जबकी ट्रम्पले सुरुको एकसयदिनमा २९ वटा बिलमा हस्ताक्षर गरेका थिए । ओबामाले यो अवधिमा १४ वटा बिलमा हस्ताक्षर गरेका थिए । यद्यपी बाइडेनले हस्ताक्षर गरेको कोरोना सम्बन्धि राहत प्याकेज भने विस्तृत रहेको छ ।

बाइडेनको सुरुको एकसयदिनमा बाइडेनले क्याबिनेट स्तर लगायतका पदमा सिफारिस गरेका ४० जनाको नाम सिनेटले अनुमोदन गरेको छ । ट्रम्पको कार्यकालको सुरुको एकसयदिनमा सिनेटले जम्मा २५ वटा सिफारिस अनुमोदन गरेको थियो । ओबामाको सुरुको एकसयदिनमा भने ६९ सिफारिस सिनेटले अनुमोदन गरेको थियो ।

बाइडेनले सुरुको एकसयदिनमा १४ जना संघीय न्यायाधिस नियुक्त गरिसकेका छन् । ट्रम्पले यो अवधिमा जम्मा २ जना र ओबामाले ३ जना सघीय न्यायाधिस नियुक्त गरेका थिए । यद्यपी ट्रम्पले आफ्नो कार्यकालमा भने अत्यन्तै धेरै संघीय न्यायाधिसहरु नियुक्त गरेर चर्चा कमाएका थिए ।

.

सुरुको एकसयदिनमा बाइडेनको स्वीकृति रेटिङ भने जम्मा ५३ प्रतिशत रहेको छ । यद्यपी ट्रम्पको तुलनामा भने यो बढी हो । ट्रम्पको एकसयदिनमा स्वीकृति रेटिङ ४१ प्रतिशतमात्र रहेको थियो । ओबामाको भने स्वीकृति रेटिङ निकै उच्च रहेको थियो । ओबामाले सुरुको एकसयदिनमा ६५ प्रतिशत स्वीकृति रेटिङ प्राप्त गरेका थिए ।

बाइडेनले एकसयदिनको अवधिमा ९ वटाराज्यको भ्रमण गरेका छन् । जबकी ट्रम्पले यो अवधिमा १० वटा राज्यको भ्रमण गरेका थिए भने ओबामाले ११ वटा राज्यको भ्रमण गरेका थिए । एकसयदिनको अवधिमा बाइडेनले कुनै पनि विदेश भ्रमण भने गरेका छैनन् । ट्रम्पले पनि एकसयदिनमा कुनै देश भ्रमण गरेका थिएनन् । ओबामाले भने ९ वटा देशको भ्रमण गरेका थिए ।

एकसय दिनको अवधिमा बाइडेनले एकपटकमात्र गल्फ खेल्न निस्के । ओबामापनि एकपटकमात्र निस्केका थिए । तर ट्रम्प भने एकसयदिनको अवधिमा १९ पटक गल्फ खेल्न निस्केका थिए ।

बाइडेनले अहिलेसम्म पूरा नगरेका ५ अध्यागमन प्रतिबद्धता

.

अमेरिकी राष्ट्रपति जो बाइडेनले कार्यभार सम्हालेको एकसयदिन पूरा भएको छ । तर बाइडेनले राष्ट्रपतिको चुनावमा र निर्वाचित भइसकेपछि विभिन्न खाले अध्यागमनबारेका प्रतिबद्धताहरु जनाएका थिए, ती मध्ये ५ प्रतिबद्धता बाइडेनले अझै पूरा गरेका छैनन् ।

अन्तिम राष्ट्रपतीय बहसका क्रममा बाइडेनलाई बुबाआमासँग विछोडिएका ५४५ छोराछोरीहरुको पुनर्मिलनका लागि के गर्नुहुन्छ ? भनेर सोधिएको थियो । बाइडेनले त्यसका लागि टास्क फोर्स बनाउने प्रतिबद्धता जनाएका थिए । टास्क फोर्स गठन त गरिएको छ भने देशनिकाला गरिएका बाबुआमालाई उनीहरुका छोराछोरीसँग पुनर्मिलन गराउन फिर्ता ल्याउने भनिएको छ । तर अहिलेसम्म एकजनालाई पनि फिर्ता भने ल्याइएको छैन ।

चुनावी अभियानका क्रममा बाइडेनले बालबालिकाहरु आइसको हिराशतबाट बाबुआमासहित तुरुन्तै रिहा हुनुपर्ने बताएका थिए । बाइडेन प्रशासनले अमेरिकामा एसाइलम खोज्ने बुबाआमा र उनीहरुका छोराछोरीहरुसहित परिवारहरुलाई हिराशतमा राख्ने अभ्यास अन्त्य गर्ने बताएको थियो । तर आइसले भने परिवार राख्ने हिराशतहरु बन्द नगर्ने र परिवारलाई हिराशतमा राख्ने अभ्यास पनि बन्द नगर्ने बताएको छ ।

सिमानामा प्रकृया अगाडि बढाउने केन्द्रहरुमा सिमित क्षमताका कारण केही परिवारहरुलाई भने हिराशतमा नराखिकनै रिहा गरिएको छ । दक्षिण टेक्सासका दुईवटा हिराशतमा दैनिक ५ सयको हाराहारीमा बुबाआमा र उनीहरुका छोराछोरीहरुलाई राख्ने गरिएको छ । यद्यपी अदालतको आदेश अनुशार देशनिकालाको प्रतिक्षा गरिरहेकाहरुबाहेकका परिवारलाई २० दिनभन्दा धेरै हिराशतमा राख्न पाइदैन । २० दिनपछि अध्यागमन अदालतमा सुनुवाईको मिति कुर्नका लागि रिहा गर्नुपर्छ ।

बाइडेनले चालु आर्थिक बर्षका लागि शरणार्थीको संख्या बढाउने प्रतिबद्धता पनि पूरा गरेका छैनन् । उनले चालु आर्थिक बर्षका लागि शरणार्थीको संख्या १५ हजारमा सिमित गर्ने ट्रम्पकै नीतिलाई यथावत राख्ने घोषणा गरे लगत्तै भएको आलोचनापछि बाइडेनले यो संख्या बढाउने बताएका छन् । तर कति बनाउने भन्नेबारे अझै घोषणा गरेका छैनन् । आगामी आर्थिक बर्षका लागि भने अमेरिकाले स्वीकार्ने शरणार्थी संख्या बढाउने घोषणा गरिसकेका छन् ।

बाइडेनले कार्यभार सम्हाल्नेबित्तिकै सिमाक्षेत्रमा पर्खाल लगाउने र भूमि अधिग्रहणको कामलाई स्थगित गर्दै ६० दिन पुनरावलोनको घोषणा गरेका थिए । समिक्षामा संलग्न व्यक्तिलाई पर्खालका लागि छुट्याइएको पैसा कहाँ पुनः निर्देशित गर्न सकिन्छ भनेर निर्णय गर्न जिम्मा दिइयो।

तर ६० दिन सकिएको पनि ३० दिन भइसकेको छ । कुनै नतिजा भने आएको छैन । पर्खाल निर्माणको काम त स्थगित छ तर स्थायी रुपमा नै पर्खाल निर्माणको काम स्थगित नहुँदा गत साता अदालतले टेक्सासको हिडाल्गो काउन्टीको ६ एकड जमिन पर्खाल निर्माणका लागि सरकारलाई दिन सहमत भएको छ । डिपार्टमेन्ट अफ जस्टिसले समिक्षा अवधिभर प्रतिक्षा गर्न गरेको अनुरोधका बाबजुत अदालत पर्खाल निर्माणका लागि जमिन दिन सहमत भएको हो ।

परिवारलाई विछोड गराउनेबारे ट्रम्प प्रशासनलाई उत्तरदायी बनाउने सन्दर्भमा बाइडेनले गरेको वाचा पूरा गरेका छैनन् । चुनावी अभियानका बेला बाइडेनले परिवारहरु अलग गराउने ट्रम्प प्रशासनको अभ्यासलाई आपराधिक भनेका थिए । साथै यसबारे को उत्तरदायी छ र त्यस्तो उत्तरदायीत्व आपराधिक हो वा होइन भन्नेबारे गहिरो अनुसन्धान गरिने बताएका थिए । तर अहिलेसम्म त्यस्तो कुनै पुनरावलोकन सुरुवात गरिएको छैन । हालै डिपार्टमेन्ट अफ जस्टिसले झण्डै ३ हजार परिवारलाई अलग गराउने ट्रम्प प्रशासनको शुन्य सहनशीलता नीतिबारेका योजनाको विस्तृत कागजात सार्वजनिक गर्न रोकेको छ ।

Leave a Reply

Your email address will not be published.