पत्रकार र अधिकारकर्मीलाई धम्क्याउने र निशाना बनाउनेलाई अब अमेरिकाले भिसा नदिने

अमेरिकी सरकारको विदेश मन्त्रालयले मारिएका पत्रकार जमाल खस्सोग्गीको सम्झनामा आज खस्सोगी प्रतिबन्ध नामको नयाँ नीति घोषणा गरेको छ । यो नीति अन्तरगत पत्रकार र अधिकारकर्मीहरुलाई धम्क्याउने र निशाना बनाउने काममा संलग्न व्यक्तिलाई अमेरिकाले अब भिसा नदिने भएको छ ।

अमेरिकी विदेशमन्त्री एन्टोनी ब्लींकेनले यसबारे स्पष्ट पार्दै यस्तो प्रतिबन्ध पत्रकार र अधिकारीर्मीलाई उनीहरुले गरेको पेशा र कामको आधारमा दबाउने, धम्क्याउने, उत्पीडन गर्ने, निगरानी गर्ने, नोक्सान पुर्याउने लगायतका काममा गम्भिर प्रकारले संलग्न व्यक्तिमाथि यस्तो प्रतिबन्ध केन्द्रीत रहने बताएका छन् । त्यस्तै कुनै पनि मुलुकका सरकारको नीतिको विरोध गरेको आधारमा पत्रकारलाई धम्क्याउने र उत्पीडन गर्नेमाथि पनि भिसा प्रतिबन्ध लागु हुनेछ ।

अमेरिकी सरकारले यसअगाडि नै पत्रकारलाई धम्की दिने ७६ साउदी नागरिकहरुलाई प्रतिबन्ध लगाएको छ । उनीहरुले साउदी सरकारको नीतिमा असहमति जनाउने पत्रकारहरुलाई धम्की र दवाव दिने लगायतका कामहरु गरेका थिए । त्यसमध्ये पत्रकार खस्सोगीको हत्यामा प्रत्यक्ष वा अप्रत्यक्ष संलग्नहरु समेत रहेको जनाइएको छ ।

अमेरिकी विदेशमन्त्रीले भने – ‘कुनै पनि देशका सरकारका तर्फबाट सरकारी नीतिमाथि असहमति जनाएको आधारमा पत्रकारलाई निशाना बनाउनेहरुलाई अमेरिकी माटोमा टेक्ने अनुमति हुनुहुँदैन ।’

प्रतिबन्ध लगाइएका व्यक्तिको ना मभने अमेरिकाले सार्वजनिक नगर्ने भएको छ । भिसा रेकर्डहरु गोप्य रहने र प्रतिबन्धमा परेका तथा पर्ने व्यक्तिको नाम सार्वजनिक गर्न नसकिने अमेरिकी विदेशमन्त्रालयका प्रवक्ताले बताएका छन् ।

पत्रकारलाई धम्की दिनेहरुको पहिले नै जारी भएको अमेरिकी भिसा समेत खारेज गरिने जनाइएको छ । पत्रकार जमाल खस्सोगीको हत्याका लागि साउदी राजकुमार मोहम्मद बिन सालमनले अनुमति दिएको अमेरिकाको खुफिया रिपोर्ट सार्वजनिक भए लगत्तै अमेरिकाले नयाँ नीतिको घोषणा गरेको हो ।

Leave a Reply

Your email address will not be published.