जनही १२ सय डलर दिने प्रस्तावसहित १ ट्रिलियन डलरको बिल अमेरिकन सिनेटमा

सबै अमेरिकनलाई जनही १२ सय डलर दिने प्रस्तावसहित १ ट्रिलियन डलरको बिल सिनेटमा पेश गरिएको छ । सिनेटका बहुमतप्राप्त दलका नेता मिच म्याक्कोनेलले कोरोना भाइरसको संक्रमणबिरुद्ध लड्न उक्त आर्थिक प्रस्ताव पेश गरेका हुन् ।

उक्त बिलमा निश्चित भन्दा कम आम्दानी भएका अमेरिकनलाई जनही १२ सय अमेरिकी डलर दिने प्रस्ताव समेटिएको छ । त्यो बाहेक एयरलाइन्सहरु र प्रभावित उद्योग क्षेत्रलाई २ सय बिलियन ऋण दिने र साना बिजनेशलाई क्षमा हुने खालको ३ सय बिलियन ऋण दिने प्रस्ताव गरिएको छ ।

एकजनालाई १२ सय र दम्पत्तिलाई २४ सय डलर दिने प्रस्तावमा उल्लेख गरिएको छ । साना बिजनेशहरुले लिने ऋण भने तलब खुवाउन र मोर्गेज तिर्न लगायतका क्षेत्रमा प्रयोग गर्नुपर्ने जनाइएको छ ।

अमेरिकाका अर्थमन्त्री स्टेभन मन्चिनले आफूहरुले हरेक अमेरिकनलाई तत्कालै चेक पठाउन खोजिरहेको बताएका छन् । अमेरिकी राष्ट्रपति ट्रम्पले आगामी दुईसाताभित्रै त्यस्तो चेक पठाउन चाहेको उनले बताएका छन् ।

अमेरिकामा यसरी चेक पठाउने गरिएको यो नै पहिलोपटक भने होइन । सन् २००८ को आर्थिक मन्दीका बेलामा अमेरिकी सरकारले हरेक बयस्कलाई ३ सय देखि ६ सय डलरसम्मको चेक पठाएको थियो । बालबालिकालाई ३ सय डलरको चेक पठाइएको थियो । त्यस्तै सन् २००१ मा पनि अधिकांश अमेरिकनहरुले ३ सय डलरको चेक प्राप्त गरेका थिए ।

Leave a Reply

Your email address will not be published.