काठमाडौं । सांगीतिक कार्यक्रमका लागि अमेरिका उडेकी गायिका आस्था राउतलाई त्यहाँस्थित डालस अध्यागमनले नेपाल फिर्ता पठाइदिएको छ ।
पर्यटक भिसामा सांगीतिक कार्यक्रम गर्न नपाइने कारण देखाउँदै आफूलाई अमेरिका प्रवेशमा रोक लगाइएको आस्थाले जानकारी दिइन् । डिसेम्बर १० मा आफू त्यहाँ पुग्दा अध्यागमन अधिकारीले उक्त कारण देखाउँदै रोकेको उनले बताइन् ।
‘मैले यसअघि पनि २०१७, २०१८ र २०२१ मा भिजिट भिसामै कन्सर्ट गरेकोबारे जानकारी गराएँ, तर उहाँहरुले मान्नुभएन,’ उनले भनिन्, ‘काठमाडौं दूतावासमा गएर पुनः पी–३ भिसा लिएर आउन उहाँहरुले भन्नुभएको छ । सोहीअनुसार दूतावासमा पुगेर काउन्सिलरसँग कुरा गर्छु ।’
पर्फमेन्स भिसा अर्थात् पीथ्रीमै पुनः अमेरिका आउन अध्यागमन अधिकारीले उनलाई भनेका छन् । आफूले सन् २०१५ मै भिजिट भिसा लिएको उनले बताइन् । अंग्रेजी नयाँ वर्ष २०२३ को छेकोमा पेन्सिलभेनियाको लानकास्टरमा नेपाली समुदायले आयोजना गरेको सांगीतिक कार्यक्रममा भाग लिन आस्था त्यसतर्फ जाँदै थिइन् ।
आफू कन्सर्टमा सहभागी हुन नपाएपछि आस्थाले दुःख व्यक्त गरेकी छन् । ‘मैले यो घटना बाहिर ल्याउनुको कारण भोलि यस्तै समस्या अरुलाई नहोस् भनेर हो,’ आस्थाले भनिन् ।
अमेरिकामा भिजिट भिषामा आउने र लाखै रुपिया कर नतिरी नेपाल लैजाने गरेको थाहा पाए पछि अमेरिकी अध्यागमनले आगामी दिनमा कलाकारलाई पी ३ भिषा लिएर आउनु पर्ने अवस्था शुरु गरेको छ । यस अघि नेपालबाट अमेरिका आएर एक महिनामा एउटा कलाकारले ५०, ६० हजार रुपियासम्म लैजान थाले पनि अमेरिकी अध्यगमनले कडाई गर्न थालेको हो । पी ३ भिषाको लागि सामान्य कलाकार भएर हुन्न र त्यसका लागि स्थापित कलाकार हुनु पर्दछ । यस्तो भिषा बढीमा एक बर्षको हुने र पछि नविकरण गर्न भिल्ने हुन्छ ।