कोरोनाबिरुद्धको भ्याक्सिन जुलाईमा अमेरिकामा ३० हजारलाई दिइने

अमेरिकाको बायोटेक कम्पनी मोडेर्नाले बनाएको कोरोनाबिरुद्धको भ्याक्सिन जुलाईको पहिलो साता अमेरिकामा ३० हजारलाई दिइने भएको छ । अमेरिकाको एलर्जी तथा सरुवा रोग राष्ट्रिय प्रतिष्ठानका निर्देशक डाक्टर एन्थोनी फाउचीले यो बर्षको अन्त्यसम्ममा यो भ्याक्सिनका एकसय मिलियन डोज उपलब्ध हुनुपर्ने बताएका छन् ।

अमेरिकाको एलर्जी तथा सरुवा रोग राष्ट्रिय प्रतिष्ठानसँगको सहकार्यमा बायोटेक कम्पनी मोडेर्नाले यो भ्याक्सिनको पहिलो र दोश्रो चरणको परीक्षण पूरा गरिसकेको छ । अमेरिकी सरकारले मोडेर्नाको भ्याक्सिन क्यान्डिडेड विकाशका लागि झण्डै ५ सय मिलियन डलर लगानी गरेको छ ।  तेश्रो चरणको परीक्षण अन्तरगत १८ देखि ५५ बर्ष उमेर समुहका तीसहजारलाई यो भ्याक्सिन दिइने भएको छ ।

नोभेम्बर र डिसेम्बरसम्म एकसय मिलियन भ्याक्सिनका डोजहरु उत्पादन गर्ने योजना बनाइएको छ । त्यती नै बेला वैज्ञानिकहरु यो भ्याक्सिनको प्रभावकारिताबारे अन्तिम निष्कर्षमा पनि पुग्नेछन् । भ्याक्सिन प्रभावकारी भएका अरु करोडौं डोजहरु उत्पादन गरिनेछ ।

अमेरिकाको बायोटेक कम्पनी मोडेर्नाले  क्लिनिकल टेस्टको नतिजा निकै उत्साहजनक आएको बताइसकेको छ । मोडेर्ना कम्पनी झण्डै ९ बर्षअगाडि स्थापना गरिएको कम्पनी हो । कम्पनीले यो भ्याक्सिन सुरक्षीत र राम्ररी सहनसकिने खालको रहेको बताएको छ । भ्याक्सिन लगाउँदा सामान्य रुपमा चसक्कमात्र हुने र लगाएको ठाउमा अलिअलि रातो हुने जनाइएको छ । दोश्रो चरणमा यसैसाता सय जनामा परीक्षण गरिनेछ ।

यसैबीच बेलायतमा पनि अष्ट्राजेनेका कम्पनीले भ्याक्सिन परीक्षण गरिरहेको छ । र त्यती नै बेला भ्याक्सिनको परीक्षण सकिने अनुमान गरिएको छ । अष्ट्राजेनेका कम्पनीबाट ३ सय मिलियन डोज भ्याक्सिन प्राप्त गर्नका लागि अमेरिकाले सहमति गरिसकेको छ । ईग्ल्याण्डमा रहेको आष्ट्राजेनेका कम्पनीले उत्पादन गर्ने पहिलो १ बिलियनमध्ये झण्डै एकतिहाई उत्पादन अमेरिकाले लिने भएको छ ।

यो भ्याक्सिन अझै पनि परीक्षणकै क्रममा रहेको छ । अमेरिकी राष्ट्रपति डोनाल्ड ट्रम्पले भ्याक्सिनको माग गरेपछि युएस डिपार्टमेन्ट अफ हेल्थले तीब्र गतिमा भ्याक्सिन उत्पादनका लागि आष्ट्राजेनेका कम्पनीलाई १ दशमलव २ बिलियन डलर दिने सहमति जनाएको छ । यो कम्पनीले सन् २०२१ मा भ्याक्सिन सर्वत्र उपलब्ध गराउनेगरी काम गरिरहेको जनाइएको छ ।

एजीडी १२२२ नामबाट चिनिने यो भ्याक्सिन युनिभर्सिटी अफ अक्सफोर्डले विकाश गरेको हो भने यसको लाइसेन्स बेलायती औषधी कम्पनी आष्ट्राजेनेकासँग रहेको छ । आष्ट्राजेनेका कम्पनीसँगको भ्याक्सिनको तेश्रो चरणको परीक्षण अमेरिकामा ३० हजार जनामा गर्न दिनका लागि अमेरिकाले सहमति जनाएको छ ।

यो कम्पनी क्याम्ब्रिजमा रहेको छ भने यो अहिलेसम्म ४ सय मिलियन डोजका लागि भ्याक्सिन बुक भइसकेको कम्पनीले जनाएको छ । यो भ्याक्सिनको एकसय मिलियन डोज बेलायतमा प्रदान गर्ने सहमति भइसकेको छ ।

अमेरिकी सरकारले भ्याक्सिन उत्पादन गर्दै गरेका अन्य कम्पनीहरु जोन्सन एण्ड जोन्सन र सानोफीसँग पनि सहमति कायम गरिसकेको छ । यसलाई कतिपयले धनी देशहरुलेमात्र सबैभन्दा पहिले आफ्ना नागरिकको संरक्षण गर्न पाउने भन्दै डर समेत व्यक्त गरेका छन् ।

भ्याक्सिन उत्पादन कम्पनी सानोफीका प्रमुखले अमेरिकामा उत्पादन भइरहेको भ्याक्सिनको पहिलो डोज अमेरिकी बिरामीहरुलाई नै दिइने बताउँदा फ्रान्सको सरकार रिसाएको थियो । अमेरिकाले शोधका लागि आर्थिक रुपमा सघाएकाले भ्याक्सिनको पहिलो डोज अमेरिकालाई नै दिने उनले बताएका थिए ।

यसैबीच  अमेरिकामा कोरानोबिरुद्धको उपचारका लागि प्रयोग गरिएको औषधी रेम्डिसिभियरको परीक्षणको नतिजा आइसकेको छ । उक्त एन्टीभाइरल औषधी सुरुमा इबोलाको उपचारका लागि बनाइएको थियो तर अहिले उक्त औषधी कोरोनाबिरुद्धको उपचारमा प्रभावकारी देखिएको छ । न्यू इंग्ल्याण्ड जर्नल अफ मेडिसिनमा प्रकाशित रिपोर्ट अनुशार यो औषधीले कोरोनो संक्रमितहरुको उपचार छोटो समयमा गर्न सफल भएको छ ।

अमेरिकाको खाद्य तथा औषधी प्रशासन एफडीएले अप्रिलको अन्तिम साता नै कोरोना भाइरसबिरुद्धको उपचारकालागि रेम्डिसिभियर नामको औषधी प्रयोगलाई आपतकालिन अनुमति प्रदान गरेको थियो । क्लीनिकल अध्ययनको प्रारम्भिक परिणामले यो औषधीको प्रयोगबाट कोरोना भाइरस संक्रमणका बिरामीहरु शीघ्र निको भएको देखाएपछि उक्त एन्टीभाइरल औषधीको प्रयोगका लागि अनुमति दिइएको थियो । कोरोनाबिरुद्ध स्पष्ट सकारात्मक परिणाम दिएको यो पहिलो औषधी बनेको छ ।

यौ औषधीको सेवन गरेकाहरुलाई ११ दिनमा नै निको भएको पुष्टी भएको छ । परीक्षण अमेरिका, युरोप र एसियाका विभिन्न ६० ठाउँमा १०५९ जना कोरोनाका बिरामीहरुमा गरिएको थियो । ५३८ जना बिरामीहरुलाई औषधीको १० दिनको कोर्स दिइएको थियो । अरु ५२१ जना बिरामीहरुलाई पनि उक्त औषधी दिइएको थियो । ति बिरामीहरुको दैनिक अनुगमन गरेर लक्षणहरु कम भएको नभएको वा कुनै साइड इफेक्ट भए नभएको निरीक्षण गरिएको थियो ।

अमेरिकामा एफडीएको स्वीकृतिपछि कोभिड १९ का अस्पतालमा भर्ना गरिएका बिरामीहरुका लागि औषधी उपलब्ध गराइएको छ । अप्रिलको अन्तिम साता नेशनल एन्स्टीच्युट अफ हेल्थको क्लीनिकल परीक्षणबाट उत्साहजनक परिणाम आएको निष्कर्ष निकालिएको दुईदिनपछि एफडीएले औषधीको प्रयोगको अनुमति दिएको थियो ।

एफडीएले यसभन्दा अगाडि मलेरियाको औषधी क्लोरोक्वीन र हाइड्रोक्सीक्लोरोक्वीनलाई आपतकालिन रुपमा कोरोनाको उपचारका लागि प्रयोग गर्न स्वीकृति प्रदान गरेको थियो । तर पछि यो औषधीको प्रयोगबाट बिरामीको मुटुको चालको समस्यादेखिएपछि उक्त औषधी प्रयोगबिरुद्ध चेतावनी जारी गरिएको थियो । हाइड्रोक्सीक्लोरोक्वीनको प्रयोगबाट मृत्युदर बढेको समेत अध्ययनले देखाएको थियो ।

अहिलेका लागि भने यो औषधी आईभीमार्फत अस्पतालमा भर्ना भएका बिरामीलाईमात्र दिन सकिन्छ । कोरोनाको संक्रमण पुष्टी भइसकेकाहरुलाईमात्र यो औषधी चलाउन अनुमति दिइएको छ ।

अहिलेसम्म विश्वमा कोरोनाभाइरसबिरुद्धको भ्याक्सिन वा औषधी उपलब्ध छैन । सरकार, औषधीनिर्माता र शोधकर्ताहरुले एकसयभन्दा बढी कार्यक्रममा काम गरिरहेका छन् ।

 

from Khasokhas.com

Leave a Reply

Your email address will not be published.