एसाईलम गर्नेले पनि आजबाट दुईबर्ष वर्क परमिट पाउने व्यवस्था

अहिलेसम्म ग्रिनकार्ड आवेदन पेन्डिङ हुनेलाई २ बर्षको म्यादसहितको वर्क परमिट जारी गर्दै आएको युएससीआईएसले आजदेखि एसाइली लगायत विभिन्न ४ श्रेणीमा पर्नेहरुलाई पनि २ बर्षको वर्क परमिट प्रदान गर्ने भएको छ । निश्चित आवेदकहरुलाई अत्याधिक म्याद सहितको वर्क परमिट प्रदान गर्नेबारे युएससीआईएसले आज अपडेट गरिएको नीति निर्देशिका प्रकाशित गरेको हो ।

शरणार्थीका रुपमा प्रवेश पाएका, एसाइलम स्वीकृत भएका एसाइलीहरु, देशनिकाला रोक्का गर्ने निर्णय भएका, महिला हिंशाबिरुद्धको संघीय कानून अन्तरगत आवेदन दिएकाहरुलाई २ बर्षको वर्क परमिट प्रदान गरिने युएससीआईएसले जनाएको छ । मानवीय कारणले अमेरिकामा परोल पाएका र डाका प्राप्त गरेकाहरुलाई पनि परोल वा संरक्षण प्रदान गरिएको अवधिसम्मकै वर्क परमिट प्रदान गरिने भएको छ ।

फरबरी ७ भन्दा अगाडि निर्णय भएका वर्क परमिट आवेदनमा यो नियम लागु हुनेछैन । फरबरी ७ वा त्योभन्दा पछाडि निर्णय भएका आवेदनमा मात्र २ बर्षको वर्क परमिट प्रदान गरिनेछ । वर्क परमिट प्रतिस्थापनका आवेदनमा पनि पहिलेकै वर्क परमिटमा भएको म्याद जारी गरिने युएससीआईएसले जनाएको छ ।

युएससीआईएस र आवेदक दुबैको भार कम गर्न र सहजताका लागि नयाँ नीति ल्याइएको हो । युएससीआईएसमा अध्यागमन सुविधाका आवेदनको चर्को ब्याकलग रहेका कारण अध्यागमन सुविधा पेन्डिङ रहँदासम्म सेवाग्राहीको सहजताका लागि यो नियम ल्याइएको हो । त्यस्तै अमेरिकामा वर्क परमिटका आवेदनमा पनि युएससीआईएसले लामो समय लगाउन थालेको छ ।

Leave a Reply

Your email address will not be published.