सरकारले अमेरिकाका लागि नेपाली राजदूत युवराज खतिवडा, भारतका लागि नेपाली राजदूत नीलाम्बर आचार्य र बेलायतका लागि नेपाली राजदूत लोकदर्शन रेग्मी सहित विगतको केपी शर्मा ओली सरकारले नियुक्त गरेका १० राजदूतलाई फिर्ता बोलाउने भएको छ । आज बसेको मन्त्रिपरिषद् बैठकले ओली सरकारले राजनीतिक कोटामा पठाएका १० राजदूतलाई फिर्ता बोलाउने निर्णय गरेको हो ।
चीनका लागि नेपाली राजदूत महेन्द्रबहादुर पाण्डेय, बंगलादेशका लागि नेपाली राजदूत डा. वंशीधर मिश्र, कतारका लागि नेपाली राजदूत नारदमुनि भारद्धाज, इजरायलका लागि नेपाली राजदूत अञ्जान शाक्य, मलेसियाका लागि नेपाली राजदूत उदयराज पाण्डे, स्पेनका लागि नेपाली राजदूत दावाफूटी शेर्पा, दक्षिण अफ्रिकाका लागि नेपाली राजदूत डा. निर्मलकुमार विश्वकर्मालाई पनि फिर्ता बोलाइने भएको छ ।
ओमानकी राजदूत शर्मिला ढकाल पराजुली र जापानी नियोगकी राजदूत प्रतिभा राणालाई ओली नेतृत्वको सरकारले अर्को नियुक्ति नभएसम्म म्याद थप गर्दै राजदूत पदमा निरन्तरता दिएको थियो । तर, मन्त्रिपरिषद् बैठकले यी दुई राजदूतबारे केही बोलेको छैन । जापानी राजदूत राणा प्रधानमन्त्री शेरबहादुर देउवाकै सासु भएकाले उनीबारे के हुने भन्ने टुंगो पनि लागेको छैन ।
अमेरिका आएको साढे ७ महिनामा फर्कदै खतिवडा
खतिवडा साढे ७ महिना अगाडि अमेरिकाका लागि नेपाली राजदुत नियुक्त भएर वासिंटन डिसी गएका थिए । खतिवडा अगाडि डाक्टर अर्जुनबहादुर कार्की अमेरिकाका लागि नेपाली राजदूत रहेका थिए ।
राजदुत खतिवडा नेपाली अर्थविद् तथा नेपालका पूर्व अर्थमन्त्री समेत हुन् । उनी नेपाल राष्ट्र बैङ्कको पन्ध्रौँ गभर्नर थिए । उनले कोलम्बोमा यूएनडीपी रिजनल सेन्टरमा तीन वर्ष अर्थशास्त्रीको रूपमा काम गरेका थिए ।
युवराज खतिवडा बिक्रम सम्बत २०५९ देखि २०६२ सम्म नेपाल सरकारको राष्ट्रिय योजना आयोगमा उपाध्यक्ष भएका थिए । उनी ओली मन्त्रिमण्डलका अर्थमन्त्री थिए । गोकुल बाँस्कोटाले राजिनामा दिएपछि उनले सुचना तथा सञ्चार प्रविधि मन्त्रीको समेत काम गरेका थिए ।